71 / 106
70
9.
Luge da kända tekst. Pirda kuva.
Hir’ i paskač
Eliba hir’ da paskač. Hö eliba
kožmuses — ei olend heil ridoid nikonz.
Hö pagižiba kesknezoi edel mittušt-ni
radod, kut paremb tehta sidä, kaiken
radon tegiba ühtes.
Kerdan hir’ da paskač löuziba tel
koume rugižjüväd. Hätken meletiba,
midä tehta jüvidenke. Lopuks pätiba
semeta pöudod. Hir’ kündi mad,
a paskač — ägesti.
Kagr kazvoi lujas hüvä. Hir’ rahnoi kagrad ičeze teravil
hambhil, a paskač tapoi sidä tarkašti suugaižil. Hö keraziba
kaiken kagran i zavodiba jagada poleti. Ühten jüvän — hirele,
toižen — paskačule, ühten jüvän — hirele, toižen — paskačule...
Jagoiba-jagoiba — jäi vaiše üks’ jüvä. Hir’ sanui:
— Nece om minun jüvä. Minä kündin, ka kaik lapaižed oma
veres.
Paskač sanub vastha:
— Ei, nece om minun jüvä. Konz minä ägestin, ka kaik
suugaižed satatin.
Hätken hö ridliba. Ühtnägoi paskač tembaiži jüvän i lendi.
”Tabakaha hän mindai i otkaha jüvä!” — meleti hän.
Hir’ ei tabadaškandend händast. Hirele tegihe huiged, miše
hän zavodi ezmäižen ridelta. Vei ičeze palan uruhu. Hän varasti
hätken paskačun, a paskač ei pördnus. Paskačun-ki palan vei
uruhu. Kaiken tal’ven hir’ eli külläine. A paskač jäi pal’hal
vacal, hüpi kevädehesai näl’ghine.
Irina Sotnikova
a) Anda vastused küzundoihe.
1) Kut hir’ da paskač eliba?
2) Midä kerdan hir’ da paskač tel löuziba?
3) Ken mittušt radod tegi?
4) Ken kaiken kagran sai?