45
Mintäh šiilillä on piikkijä?
Ennein-muinoin kaikki šiilit oltih ilmain piikkijä. A šiilien
liha oli ylen makie ta kaikki eläimet tahottih šitä maissella.
Kerran yksi Šiili peitteliyty pevoista kuušen alla ta šiih ni
uinosi. Yöllä nousi tuuli ta puu tiputti Šiilin piällä nieklasieh.
Konša Šiili havaččeutu, piikit-nieklaset oli peitetty koko šen
šelän.
Šiili läksi kävelyllä ta šillä vaštah tuli repo. Šiili ei
kerinnyn pöläštyöki, kun repo hypähti šen luo, avasi šuun ta
tarttu kyleštä. ”No, nyt tuli loppu”, ajatteli Šiili. Ka yhtäkkie
repo vinkeyty ta hyppäsi pois — nieklaset kipiešti pisseltih šen
kielen, eikä še tahton enyä šyyvvä Šiilie.
A Šiili ihaštu, jotta pevot ei šuaha šitä šyyvvä ta jätti
piikit ičellä. Kohta Šiili opaštu kiäriytymäh keräkši ta šillä tuli
helpompi elyä. Šiitä ajašta kaikilla šiililöillä on piikkijä.
Aleksandr Podjel’ski
2.
Luaji koissa. Vaštua kyšymykših.
1. Mi tekstin nimi on?
2. Ken kirjutti tämän starinan?
3. Oliko tekstissä äijän uušie šanoja?
4. Keneštä tämä starina on?
5. Oletko šie konšanih nähnyn šiilijä?
6. Mintäh kaikilla šiililöillä on piikkijä?
3.
Mimmosih kyšymykših vaššatah allaviivatut šanat?
Kirjuta kyšymykšet vihkoh.